Srinivasan R

மகாபாரதத்தில் வரும் சூர்யபுத்திரன் கர்ணனை மையமாகக்கொண்டு, அவன் வாழ்க்கைப் பயணத்தைவைத்து உருவாக்கப்பட்டிருக்கும் அனிமேஷன் வெப் தொடர்தான் இந்த ‘தி லெஜெண்ட் ஆஃப் கர்ணா’. சோனி லிவ் தளத்தில் அனிமேஷன் தொடராக வெளியாகியிருக்கிறது. கர்ணனின் வாழ்க்கையை மட்டுமே மையமாகவைத்து, அவரின் பார்வையில் நகரும் கதையமைப்பின் மூலம் அந்தக் கதாபாத்திரத்தின் ஆழத்தை உணர முடிகிறது. குறிப்பாக, கர்ணனின் தனிப்பட்ட குணங்களையும், துரியோதனனுடனான நட்பையும் அதிகம் பேசுகிறது இந்தப் படைப்பு. பலமுறை எடுத்தாளப்பட்ட கதை என்பதால் அனிமேஷனில் புதியதோர் அனுபவம் தேவைப்படுகிறது. ஆனால், அது இங்கே சுத்தமாக மிஸ்ஸிங்! இரண்டு காட்சிகளை இணைக்கும் டிரான்சிஷன்களில்கூட ஆங்காங்கே சொதப்பியிருக்கிறார்கள். திரைக்கதையில் வேகம் காட்டி நகரும் காட்சிகள் சரியான கட்டமைப்பின்றி நகர்வதால் ஈர்க்க மறுக்கின்றன. இந்தச் சிக்கல்கள் அனைத்தும் நம்மைத் தொடருடன் ஒன்றவைக்க மறுக்கின்றன. அதேசமயம், பின்னணி இசை தேவையான காட்சிகளில் போர் முழுக்கமிட்டு வசீகரிக்கிறது. இன்னும் புதுமை தேவை கர்ணா!

விடுமுறையை ஜாலியாகக் கழிக்க, தாய்லாந்துக்குச் செல்லும் கல்லூரி நண்பர்கள் குழு, ‘தி டெவில்ஸ் மவுத்’ (The Devil’s Mouth) என்ற மர்மமான கடல் குகைக்குள் சிக்கிக்கொள்கிறது. வெளியேறும் வழி தெரியாமல் தவிக்கும் அவர்களை வெறியோடு துரத்துகிறது ராட்சத சுறா. இறுதியில் அவர்கள் உயிருடன் கரை சேர்ந்தார்களா என்பதே அமேசான் பிரைமில் வெளியாகியிருக்கும் இந்த சர்வைவல் த்ரில்லரின் கதை. (தமிழ் டப்பிங் உண்டு). 106 நிமிடங்கள் ஓடும் இந்தப் படத்தை ஜெஃப் வாட்லோ இயக்கியிருக்கிறார். முக்கியக் கதாபாத்திரத்தில் நடித்திருக்கும் கேத்ரின் நியூட்டன், சுறா துரத்தும் காட்சியிலும், நண்பர்களுக்கு வழிகாட்டும் இடத்திலும் ஸ்கோர் செய்கிறார். துணைக் கதாபாத்திரங்களாக வரும் நண்பர்கள், சுறாவின் வேகத்துக்கு ஈடுகொடுத்து நடித்திருக்கிறார்கள். ஒளிப்பதிவும் பின்னணி இசையும் ரசிக்கவைக்கின்றன. ஆனால், பயமுறுத்தாத சுறாவின் VFX காட்சிகளும், யூகிக்க முடிந்த க்ளைமாக்ஸும் சறுக்கல்! இதே டெம்ப்ளேட்டில் நிறைய சாகசப் படங்கள் வந்துவிட்டதால் இந்த `டெவில்ஸ் மவுத்’துக்குள் விருப்பம் இருப்பவர்கள் செல்லலாம்.

தண்டனை போஸ்ட்டிங் பெற்று மதுரையில் பணியாற்றுகிறார் காவல்துறை துணை ஆய்வாளர் மூசா ராசா (சசிகுமார்). எட்டுவழிச் சாலை அமைக்க மத்திய அரசு முற்பட, மாநில அரசு அதற்கு எதிர்ப்பு காட்ட, இருந்தபோதும் அரங்கேறுகிறது திட்டத்துக்கான அடிக்கல் நாட்டு விழா. ஆனால், எதிர்பாராதவிதமாக, அதற்காகத் தோண்டப்படும் குழியில் எலும்புக்கூடு ஒன்று கிடைக்க, இந்தச் சம்பவம் அரசியல் வட்டாரத்தில் பெரும் கவனத்தைப் பெறுகிறது. அந்த வழக்கை மூசாவிடம் ஒப்படைக்கிறார் காவல் உயரதிகாரி (அனகா). அதற்கான விசாரணையில் மணியின் (யஸ்வந்த்) கதை வெளிச்சத்துக்கு வர, உண்மையில் அந்தக் குற்றத்தைச் செய்தது யார் என்பதை அலசுகிறது இந்த அமேசான் பிரைம் தொடர். 2022-ம் ஆண்டு, எஸ்.ஜே.சூர்யா, சஞ்சனா கிருஷ்ணமூர்த்தி நடிப்பில் அமேசான் பிரைமில் வெளியான `வதந்தி’ தொடரின் இரண்டாவது சீசன் இது. ஆனால், இது தனிக்கதை என்பதால் முதல் சீசனைப் பார்த்திருக்கவேண்டிய அவசியமில்லை.

உலக சினிமாவின் பெருங்கரையை பேரிரைச்சலுடன் கடந்த தி ஒடிஸி' அலை, இன்னும் நின்றபாடில்லை. நேர விளையாட்டுகளின் மாய வித்தகன் இயக்குநர் கிறிஸ்டோபர் நோலன், இந்த முறை ஹோமரின் கிரேக்க புராணமான ஒடிஸி’யைத் தன் திரைமொழியில் பிரமாண்ட திரையனுபவமாக மாற்றியிருக்கிறார். நடிகர்கள் தேர்விலேயே சர்ச்சைகள் கிளம்ப, தனி மனித சாகசமாக நீளும் ஒரு புராணத்தைப் போருக்கு எதிரான பெருங்காப்பியமாக மாற்றியிருக்கிறார் நோலன். அதீத பொருட்செலவைக் கோரும் ஐமேக்ஸ் 70மி.மீ படச்சுருள் தொழில்நுட்பத்தில் படமாக்கப்பட்ட இதை நிச்சயம் பெரிய திரையில் காண வேண்டும் என்பதே நோலனின் கோரிக்கை! ஐமேக்ஸ் 70 மி.மீ திரையரங்குகள் இல்லாத இந்தியாவில், அதைவிடக் குறைந்த தொழில்நுட்பத்தில் காணவும் கூட்டம் அலைமோதியது நோலனுக்காக மட்டுமே!

தனது டிரேட் மார்க் நகைச்சுவை கலந்த எதார்த்தமான நடிப்பால் அர்ஷத் வார்ஸி கவர, அறிமுக நடிகர் வீர் ஹிரானியும் சிறப்பான பங்களிப்பை வழங்கியிருக்கிறார். வில்லனாக விக்ராந்த் மாஸேவும், சிறு வேடத்தில் போமன் இரானியும் ஈர்க்கின்றனர். சைபர் குற்றங்களை எந்தவிதமான சிக்கலான தொழில்நுட்ப வார்த்தைகளுமின்றி, நகைச்சுவையும் மனித உணர்வுகளையும் கலந்து, அனைவருக்கும் எளிமையாகப் புரியும்படி கொடுத்திருக்கிறது இயக்குநர் ராஜ்குமார் ஹிரானி தலைமையிலான எழுத்தாளர் குழு. ஆனால், சீரியஸான குற்றப் பின்னணியில் நகைச்சுவையை அதிகம் திணித்திருப்பது சில இடங்களில் கதையின் தீவிரத்தைக் குறைக்கிறது. ஆங்காங்கே எழும் லாஜிக் கேள்விகளையும் மறந்தால், ராஜ்குமார் ஹிரானி டெம்ப்ளேட்டில் ஓர் உணர்வுபூர்வமான பொழுதுபோக்குத் தொடர் இது!

அதிகாரவெறி பிடித்தவராக சமுத்திரக்கனியும், ஆழமான கதாபாத்திரத்தில் ஐஸ்வர்யா ராஜேஷும் சிறப்பான நடிப்பை வழங்கியிருக்கின்றனர். ஆனால் சுனில் கதாபாத்திரம் முற்றிலும் வீணடிக்கப்பட்ட உணர்வையே உண்டாக்குகிறது. 80-களின் துறைமுக நகரத்தை நம்பகத்தன்மையுடன் கண்முன் நிறுத்தும் கலை இயக்கம் மற்றும் ஒளிப்பதிவு தொடருக்குப் பெரும் பலம். தந்தை - மகள் இடையேயான முரண்பாடுகளும், நடிகர்களின் தேர்ந்த நடிப்பும் ஆங்காங்கே திரைக்கதையைத் தாங்கிப் பிடிக்கின்றன. ஆனால், தொடரின் ஆன்மாவாக இருக்க வேண்டிய இந்தக் காட்சிகள் குறைவாக இடம்பெற்றிருப்பது வேண்டிய தாக்கத்தை ஏற்படுத்தவில்லை. அதோடு எந்தவிதப் புதுமையுமின்றி மெதுவாக நகரும் திரைக்கதை, எளிதில் யூகிக்கக்கூடிய திருப்பங்கள் தொடரின் சுவாரஸ்யத்தைக் குறைக்கின்றன. முன்னணி நடிகர்களின் எதார்த்த நடிப்பு மட்டுமே இந்த இசாகப்பட்டினத்தைக் கரைசேர்க்கிறது.

கேரளத்தின் அடர்ந்த காட்டுப்பகுதியில் இருக்கும் ஒரு சபிக்கப்பட்ட கிராமத்தில் வசிக்கும் ராஜனை (அமித் சக்கலக்கல்) மணந்து, அந்த ஊருக்கு மருமகளாக வருகிறார் லீலா (அகிலா பார்கவன்). அவர்களின் வீட்டிலேயே வசிக்கும் முத்தச்சி (கே.பி.ஏ.சி.லீலா), ஒரு முன்னாள் சூனியக்காரி என்பதால் அவரின் அமானுஷ்ய நடவடிக்கைகள் லீலாவை அச்சத்துக்கு உள்ளாக்குகின்றன. இதற்கிடையே லீலாவுக்கு ஒரு மகன் பிறக்க, அவனை முத்தச்சியின் குணமும் அமானுஷ்யமும் பின்தொடர்வதாக உணர்கிறார் லீலா. முத்தச்சியின் முன்கதை என்ன, அந்தச் சிறுவன் அவரைப்போலவே மாறினானா, தாயாக லீலா எடுக்கும் முடிவு என்ன என்பதே இந்த ஜி5 மலையாள ஹாரர் சீரீஸின் கதை.

எனோலா ஹோல்ம்ஸாக மில்லி பாபி பிரவுன், மீண்டும் ஒரு முறை அந்த வேடத்துக்குக் கச்சிதமாகப் பொருந்துகிறார். ஷெர்லாக்காக ஹென்றி கேவில்லுக்கு அதிக வேலை இல்லை. பிற கதாபாத்திரங்கள் தேவையான அளவு பங்களிப்பைத் தந்துள்ளனர். ஒளிப்பதிவு, ஆடை வடிவமைப்பு, கலை இயக்கம் ஆகியவை காலப் பயணம் செய்யவைக்கின்றன. ஆனால், அடுத்தடுத்து இருவர் காணாமல்போயும், யார் காரணம் என்று கண்டறியப்பட்ட பிறகு வரும் அந்தக் காதல் காட்சி படத்தைச் சோர்வடையச் செய்கிறது. முழுமையடையாத காட்சிகள், தொக்கி நிற்கும் கதாபாத்திரங்கள், படத்தின் தாக்கத்தைக் குறைக்கின்றன. இருந்தும் விசாரணைக் காட்சிகள் படத்தைக் கரை சேர்க்கின்றன.